Gikonsiderar sa dakbayan sa Sugbo ang pagpausbaw sa panarbaho sa senior citizen pinaagi sa pagtanyag sa mga pribadong negosyo og 2 porsiyento nga deduction sa kinatibuk-ang tinuig nga buhis sa negosyo kon mo-hire sila og senior citizens nga empleyado.
Nasayran nga ang incentive kabahin sa gisugyot nga ordinansa nga gisang-at ni Konsehal Sisinio Andales, nga nagtinguha sa pagpalambo sa inclusive growth ug pag-ila sa bililhong kasinatian ug kahanas nga gidala sa mga senior citizen sa lokal nga ekonomiya.
Gitumong sa “An Ordinance Promoting Employment Opportunities for Senior Citizens in Cebu City Through Incentives for Private Business Participation,” ang pagdasig sa mga kompanya sa pagpangtrabaho sa mga senior nga molangkob sa labing menos 10 porsiyento sa ilang trabahante.
Gani, ang mga negosyo nga motuman makadawat og 2 porsyento nga pagkunhod sa ilang kinatibuk-ang tinuig nga buhis sa negosyo nga utang sa City Government.
Sa pikas bahin, gikuhaan usab og pagpasabot sa Bombo Radyo Newsteam si Konsehal Jun Alcover kalabot sa pagkalangan sa paghatag sa ayuda sa mga senior diin gikatakda untang ihatag sa unang semana.
Matud ni Alcover nga tungod kay bag-o ang mayor ug nagkinahanglan kini og adjustment maong hatagan lang usab og kahigayonan apan nipasalig man hinuon na kini nga mahatag sa ikatulong semana.
