CEBU –Patay ang duha ka mga indibidwal ug 16 ang nalandig sa tambalanan human nga nakaangkon ug tipus o ‘typhoid fever’ sa lungsod sa Barili, probinsiya sa Sugbo.
Sa eksklusibo nga pakighinabi sa Bombo Radyo Cebu ni Barili outgoing Mayor Julito Flores, nga nagsugod ang maong sakit sa nakalabay nga semana, diin nikabat pa kini sa kapin 20 ka mga indibidwal ang nalandig sa tambalanan.
Matud pa, sagad nakasinati ug grabi nga dehydration ug pagpanakit sa tiyan ang mga biktima, apan ulahi na nga nagpa-tambal, hayan duha gayud ang nakalas human nga wala na matabang.
Gitino ni Mayor Flores nga gumikan sa hugaw o contaminated nga tubig nga na-inom sa mga biktima ang hinungdan sa pagtumaw sa maong sakit.
Sigon pa, adunay tubod sa Barangay Mantayupan sa naasoy nga lungsod diin gikonektar sa usa ka tangke sa tubig pinaagi sa mga tubo.
Basi sa pagsusi, giingong adunay leak ang mga tubo hinungdan sa pagkahugaw sa tubig ug na-inom sa mga residente.
Hinuon, gitataw ni Mayor Flores nga wala pa kini nila giisip nga outbreak.
