Gidawat na sa Department of Justice (DOJ) ang kaso nga giduso sa National Bureau of Investigation Cebu District Office (NBI-CEBDO) ug sa Task Force on Flood Control Projects nga naglambigit sa duha ka gidudahang “ghost projects” sa Third District Engineering Office, ug matod ni Arnel Pura, ang Head ug Agent -in-charge sa National Bureau of Investigation Cebu District Office (NBI-CEBDO), nga ang NBI District Office ang nagpahigayon sa imbestigasyon.
Apan, atol sa pakighinabi sa Bombo Radyo Cebu kang Pura, iyahang giklaro nga niadtong Enero ning tuiga, opisyal nga gipasa sa NBI-CEBDO, uban sa ilang Task Force ug sa NBI Legal Division gikan sa Manila, ang reklamo ngadto sa DOJ.
Pagkahuman sa pito ka buwan ug sa dugang nga mga dokumento nga gipangayo aron matuman ang probisyon sa DC 20, pormal na nga gidawat sa DOJ ang maong kaso.
Sa karon, giklaro ni Pura nga dili pa sila mamahimong mobutyag og mga pangalan o kon aduna bay politikong nalakip niini tungod kay ang maong kaso i-refer pa sa panel of prosecutors kay ipaubos gihapon kini sa preliminary investigation ug sa maong hugna, dili pa masayran ang pangalan sa mga personalidad nga nalambigit niini, dili pa angay nga ipagawas ang ilang mga pangalan.
Ingun man iyaha sang gihatagan og katin-awan nga ang maong reklamo anaa pa karon sa buhatan sa DOJ ug wala pa sa lebel sa pagpasaka og kaso tungod kay matod niya, ang findings nga ma-establisar sa DOJ sa maong kaso i-endorso kini ngadto sa Ombudsman. Tungod kay ang Ombudsman mao na ang mopasaka og kaso ngadto sa Korte.
Gibutyag ni Pura nga unfair para sa mga naasoy nga personahe kon ibutyag ang ilang pangalan apan sa pikas bahin posible man diay nga matangtang sila sa reklamo kon kulang ang ebidensya, hinungdan nga maghulat una nga mahuman ang preliminary investigation sa panel sa prosecutors sa DOJ sa dili pa makahimo og dugang pahayag bahin sa mga respondents.
Sa katapusan, gibutyag ni Pura nga ang maong duha ka ghost projects gibana-banang nagkantidad og 163 milyones ka pesos nga anaa nahimutang sa Balamban, Cebu.
Gahapong adlawa, gipahibalo sa Department of Justice (DOJ) nga nakadawat sila pinaagi sa National Prosecution Service (NPS) og duha ka managlahing kriminal nga reklamo batok sa 20 ka indibidwal nga naglakip sa mga opisyal, inhinyero, ug empleyado sa Department of Public Works and Highways (DPWH) Cebu 3rd District Engineering Office, ingon man pipila ka pribadong indibidwal.
Ang maong mga reklamo giduso sa National Bureau of Investigation (NBI) Cebu District Office kalambigit sa ginaingong anomaliya sa duha ka proyekto sa flood control sa Barangay Sinsin ug Balamaban sa Sugbo.
Diin, adunay pito ka Kriminal nga kaso nga giatubang sa mga suspek, sama sa Illegal Use of Public Funds or Property Technical Malversation (Article 220, Revised Penal Code), Malversation of Public Funds (Article 217, Revised Penal Code), Paglapas sa Section 3(e) ug 3(g) sa Republic Act No. 3019 (Anti-Graft and Corrupt Practices Act), Perjury (Article 183, Revised Penal Code), falsification by Private Individuals ug Use of Falsified Documents (Article 171, Revised Penal Code), Falsification of Documents by Public Officers (Article 172, Revised Penal Code), Paglapas sa Section 65(b), Paragraphs 2 & 4 sa Republic Act No. 9184 (Government Procurement Reform Act).
Subay niini, giklaro sa DOJ nga ang maong mga kaso anaa pa sa matang sa preliminary investigation. Wala pa’y pinal o opisyal nga silot o hukom nga naggawas batok sa bisan ni kinsa man.
Ingun man nga matod sa ahensya, hatagan og higayon ang tanang 20 ka respondents nga makaduso sa ilang counter-affidavit ug depensa aron tubagon ang mga ebidensya batok kanila sa dili pa pinal nga desisyunan sa DOJ ang reklamo.
Nipahinomdom usab ang departamento nga kining duha ka porsyon sa reklamo pa lamang sa mas lapad nga imbestigasyon bahin sa mga anomalya ug kurapsyon sa mga flood control projects sa tibuok nasud.
