CENTRAL VISAYAS-Moabot sa 20 ka mga incumbent barangay officials sa Central Visayas nga gipaubos sa watchlist sa kapulisan tungod sa giingong kalambigitan sa illegal nga drugas ang gimonitor sa Police Regional Office sa Central Visayas (PRO 7) gumikan sa nagkaduol nga Barangay ug Sangguniang Kabataan Election (BSKE).
Ang nasangpit nga mga barangay officials nadugang sa police blacklist dihang mi-turn in sila sa panahon sa administrasyon ni kanhi presidente Rodrigo Duterte, matod ni Police Lieutenant Colonel Gerard Ace Pelare, tigpamaba sa PRO 7.
Pipila niini nga mga indibidwal, sumala ni Pelare, natanggong na ug gikiha.
Ang 20 ka mga otoridad sa barangay nalakip sa 430 ka mga barangay officials sa tibuok nasud nga gibantayan sa Philippine National Police tungod sa giingong kalambigitan niini sa mga operasyon sa gidiling drugas.
Gikonsiderar sila nga high-value ug street level nga mga indibidwal sa drugs watchlist.
Gusto ni Interior Secretary Benjamin Abalos nga walay mga barangay opisyal o kandidato sa BSKE nga adunay koneksyon sa ilegal nga kalihokan sa drugas.
Gihangop sa kapolisan ang paningkamot ni Abalos nga makapaubos sa drug test ang tanang kandidato sa BSKE aron maseguro nga dili sila tiggamitan og drugas.
