CEBU CITY-Nasunog patay ang tulo ka managsoon ug 11-ka-bulan nga ig-agaw human natanggong sa dihang nasunog ang ilang balay sa dakbayan sa Sugbo sayo sa Huwebes, Nobyembre 23, 2023.
Gipukaw sa mga residente sa Sitio Upper Capaculan, Barangay Tisa, dakbayan sa Sugbo niadtong Huwebes sa buntag ang sunog nga daling mikatap nga halos wala na mabantayi.
Usa ka sakop sa Cebu City Fire Station nga nagpuyo duol sa fire scene nakabantay sa sunog ug daling nanawag sa ilang estasyonan aron pagsusi.
Human makompirmar ang sunog pinaagi sa closed-circuit television (CCTV), 36 ka mga firetruck ang gipadala aron pagtabang.
Matud pa ni Senior Fire Officer (SFO2) Wendell Villanueva, information officer sa Cebu City Fire Station, nga nagsugod ang sunog sa balay sa usa ka babaye nga giilang si Gemma Cabornay nga paryente sa mga biktima.
Human mapalong ang kalayo, pipila ka mga tawo ang miduol sa mga ginikanan sa mga bata ug nisulti kanila nga ang ilang mga anak anaa pa sa sulod sa ilang balay.
Diha-diha dayon, nakaplagan sa mga opisyal sa kabomberohan ang patayng lawas sa tulo ka mga bata sa unang andana.
Ang mga biktima mao ang managsuon nga giapelyido sa Bayaton nga nag-edad og 1, 6, ug 10, ug ang ilang 11-ka-bulan nga ig-agaw kansang patayng lawas katapusang nadiskubrehan.
Matod ni Konsehal Philip Zafra nga, ang mga ginikanan sa mga bata nagkapuliki sa pag-andam og pagkaon sa ilang kan-anan nga nahimutang duol sa ilang balay dihang nahitabo ang trahedya.
