CEBU – Hingpit nang gitak-upan sa Bureau of Fire Protection Cebu City ang Fire Prevention Month karung adlawa, Marso 31, 2022.
Gibutyag ni SFO2 Wendell Villanueva, ang tigpamaba sa Cebu City Fire Office, nga nahuman ang ilahang mga aktibidad pinaagi sa usa ka simulation exercise sa mga skyrise building sa Cebu Business Park.
Matud pa, bisan pa man ug nahuman na ang Fire Prevention Month, dili muhunong ang mga kabomberohan sa pag-intensify sa ilahang kampanya, ilabi na karun nga hilabihan ang ka-init sa panahon diin mulanat pa hangtud sa buwan sa Mayo.
Subay niini, gihangyo ni Villanueva ang publiko nga padayon nga magbinantayon ug magpakabana sa tanang mga programa sa BFP arun nga malikayan ang sunog.
Samtang, gipahibalo usab sa naasoy nga tigpamaba nga sugod Marso 1 hangtud ning adlawa, nakatala ang Cebu City Fire Office ug 19 ka sunog diin sa kinatibuk-an mikabat ug P52 billion ang danyos, itandi kini sa nakalabay nga tuig (2021), adunay 18 ka mga sunog ang natala ug mikabat sa P7.4 million ang danyos.
Sa tuig 2020, adunay 23 ka sunog ang natala, ug mikabat lang sa P1.4 million ang danyos; samtang sa tuig 2019, adunay 70 ka mga fire incidents ang natala, diin mikabat sa P1.4 million ang danyos.
Gipasabot ni Villanueva nga ning kasamtangan nga buwan (Marso 2022) dako ang danyos nga natala, gumikan kay sagad sa mga nasunog kay mga commercial building.
