CEBU – Dul-an sa 20 ka tonelada nga basura ang nakolekta atol sa gipahigayong International Coastal Cleanup sa dakbayan sa Lapu-Lapu niadtong Sabado, Septiyembre 17, 2022.
Kini ang gibutyag ni Jocelyn Abayan, environmental management specialist sa City Environment and Natural Resources Office (CENRO), nga lakip sa ilang nahipos nga mga basura mao ang food wrappers ug pouch, plastic bottles, nylon ug mga pisi, foam cups and plates, metals, papers ug uban pa.
Dugang pa niya nga 35 ka sako sa basura ang nakolekta sa ilang mga garbage truck, sa ilahang pagpanglimpyo sa baybayon nga gitambungan sa mga usa ka libo nga mga boluntaryo.
Nihatag og gibug-aton sa kamahinungdanon si Lapu-Lapu City Mayor Junard “Ahong” Chan, kinsa nitambong sa maong aktibidad sa pagpabiling limpyo sa ilang kabaybayonan kay kini maoy tinubdan sa panginabuhian sa ubang mga Oponganon.
