CEBU – Dul-an sa 200 ka mga pamilya sa Barili kansang mga sakop lakip sa nataptan sa tipos ug dengue fevers ang nakadawat og hinabang gikan sa nasudnong kagamhanan.
Di mominos 198 ka pamilya gikan sa upat ka barangay sa lungsod sa Barili niadtong Miyerkules, Hunyo 29 ang nakadawat og financial assistance nga nagkantidad og P5,000 gikan sa Department of Social Welfare and Development sa Central Visayas (DSWD-7).
Nagkanayon si 3rd District Rep. Pablo John ‘PJ’ Garcia naggikan ang mga benepisyaryo sa Brgy. Poblacion, Gunting, Mantayupan ug Boloc-boloc kung diin nagpuyo ang kadaghanan sa mga biktima.
Gipasalig ni Garcia sa ubang mga kwalipikadong benepisyaryo nga aduna pay laing hugna sa distribution sa dili madugay.
Bag-o lang nag-antos ang lungsod sa Barili sa pagdagsang sa mga kaso sa typhoid fever, diin 98 ka mga pasyente ang natala sukad Enero.
Ug hangtod karon wala pa matino sa mga health official ang hinungdan sa pagkaylap sa typhoid fever sa maong lugar.
