CEBU – Gipahibalo sa Cebu City Agriculture Department (CAD) nga mukabat na sa 2,000 gikan sa 3,000 ka mga mag-uuma ang nakadawat na sa ilahang economic stimulus package.
Gibutyag ni Engr. Joel Baclayon, ang kasamtangan nga nangulo sa CAD, nga katuyoan sa stimulus package mao ang paghatag ug puhonan sa mga mag-uuma sa pagpalambo sa ilahang produksyon.
Matud pa, posibli nga karung katapusan sa Hulyo 2022 ipang-apud-apud ang package alang sa mga nahabilin nga 1,000 ka mga mag-uuma.
Nasayran nga matag mag-uuma ang makadawat ug P5,000 gikan sa naasoy nga stimulus package nga ilahang magamit alang sa fertilizer, equipment, seedling, farm animal raising ug uban pang agricultural production.
Samtang nanghinaut si Baclayon nga suportahan ni President-elect Ferdinand Marcos, Jr. ang plano sa City Agriculture nga magtukod ug mega farm sa bukirang barangay sa syudad.
