2024 Paris Olympics, hingpit ng gitak-opan; USA, midominar sa medal tally sa pagtak-op sa Paris Games

PARIS OLYMPICS-Hingpit ng gitak-opan ang 2024 Paris Olympics human sa pipila ka adlaw nga pakigtiki og pakigsangka sa mga atleta gikan sa nagkandaiyang mga nasud arun sa pagpakita sa ilang kahanas.

Ning Olympics 2024, malampusong nabawi sa United States of America ang top spot sa medal tally mga oras sa wala pa ang closing ceremony sa Paris 2024 Olympics.

Nahimo kini pinaagi sa usa ka talagsaon nga panagsangka sa basketball team sa mga babaye tali sa Team USA ug host country nga France.

Ang mga players sa basketball sa France hapit usab makahimo sa usa sa mga all-time Olympic upsets apan gipugngan kini sa Americans ug midaog lang sa labaw usa ka puntos, nga 67-66.

Kini ang ilang ikawalong sunod-sunod nga Olympic gold sa women’s basketball ug ika-40 usab nga gold medal sa US sa medal table sa Paris Games.

Susama kini nga gidaghanon sa 40 ka bulawang medalya sa China apan ang US adunay 44 ka silver ug ang China 27 lang.

Ug sa kinatibik-an adunay 126 ka medalya kon itandi sa 91 alang sa Chinese.

Ang Japan mitapos sa ikatulo sa medal tally nga adunay 20 ka bulawan – susamang puwesto niadtongTokyo 2020.

Mao kini ang labing maayong paghakot og medalya sa Australia, nga mitapos sa ikaupat nga may 18 ka bulawan, samtang ang host France mitapos sa ikalima nga may 16 ka bulawan, ang ilang labing maayong resulta sukad niadtong 1900 sa dihang sila usab ang nag-host sa Olympics.

Ania ang Olympic medal tally:

1. United States – Gold – 40 Silver – 44, Bronze -42 – Total 126
2. China – Gold – 40 Silver – 27, Bronze -24 – Total 91
3. Japan – Gold 20 Silver- 12, Bronze – 13 – Total 45
4. Australia – Gold 18, Silver-19, Bronze -16 – Total 53
5. France – Gold 16 Silver-26, Bronze -22 – Total 64
6. Netherlands – Gold – 15, Silver- 7, Bronze -12- Total 34
7. Great Britain – Gold 14, Silver-22 Bronze -29- Total 65
8. South Korea- Gold 13, Silver-9, Bronze -10 – Total 32
9. Italy – Gold 12, Silver- 13, Bronze – 15 Total 40
10. Germany – Gold 12, Silver-13, Bronze -8 – Total 33

Samtang ang Team Pilipinas kay tied sa ika-37 nga pwesto nga adunay 2 ka gold ug 2 ka bronze medals nga gikan ni gymnast Carlos Yulo ug Boxers nga sila Aira Villegas ug Nesthy Petecio.