Mokabat labing menos 204 ka mga indibidwal o 49 ka mga pamilya ang gipabakwit gahapong adlawa,gikan sa ilang mga panimalay sa Sitio Litmon, diin usa ka coastal area sa Barangay Dumlog, dakbayan sa Talisay sa habagatang Sugbo paingon sa mas luwas nga covered basketball court.
Kini human ang kusog nga hangin ug dagkong mga balod miguba sa pipila ka mga balay ug nakaguba sa uban sa pipila ka mga residente sa Litmon.
Ang kusog nga hangin ug dagkong balod tungod sa epekto sa Severe Tropical Storm Kristine.
Hinungdan nga hugot nga gimonitor karon sa mga sakop sa kapulisan sa Talisay City Police Station ug Talisay City Disaster Risk Reduction and Management Office (CDRRMO), ang mga residente sa maong dapit, ug daling mipahigayon og pagpabakwit sa mga apektadong residente ngadto sa mas luwas nga lugar.
Basi sa asoy sa mga apektadong residente, lima ka mga balay ang naugdaw ug tulo ang nangaguba sa kusog nga hangin ug dagkong mga balod.
Gihatagan dayon sa kagamhanan sa dakbayan og hinabang ang maong mga indibidwal, sama sa paghatag kanila og ready-to-eat food.
Gihimo usab sa mga otoridad ang pakig-alayon sa mga barangay sa dakbayan ug sa Philippine Coast Guard sa pagdili sa paglangoy ug pagkaligo sa mga baybayon aron malikayan ang bisan unsang aksidente ug dili maayong mga insidente.
Samtang, ang mga opisyal sa barangay sa Barangay Manipis sa dakbayan sa Talisay nipahinumdom usab sa mga motorista nga magbinantayon batok sa posibleng pagdahili sa yuta.
