Gamahay ang 21-anyos nga lalaki human gipadakop sa iyang kaugalingong manghud tungod sa giingong gikawat ang mahalong selpon niini ug gibaligya aron ipusta sa duwa nga scatter, niadtong hunyo 23, sa Upper Laguerta Tarcom, Barangay Lahug ning Dakbayan sa Sugbo.
Giila ang suspetsado nga si alyas Ben, walay trabaho ug lumulupyo sa naasoy lugar, samtang ang biktima mao ang iyang maghud nga babaye nga si alyas Mae nga nagtrabaho isip usa ka waitress.
Sumala sa imbestigasyon, nagpatabang si Mae sa mga barangay tanod sa ilahang dapit sa dihang nahibaw-an niini nga gikuha sa iyang maguwang ang iyahang selpon hinungdan nga nasikop ra dayon ug gidala sa Mabolo Police Station diin mag-atubang kini og kasong pagpangawat.
Hinuon, wala gilimod sa suspek ang pasangil ug matud pa nga iya kining gibaligya sa Colon.
Wala na ma rekober ang selpon nga nagkantidad og P47,000, ug nabaligya lang kini sa kantidad nga P1,800 ug miangkon kini nga ang halin iyahang gipalit og pagkaon ug gipacash-in sa iyang account aron iduwa og ‘scatter’, usa ka online nga sugal. | via Bombo Nathaniel Sandoval
