CEBU – Andam na karun ang Police Regional Office 7 sa pag-umul ug Special Investigation Task Group (SITG) alang sa pagpusil patay kang Police Captain Delfin Bontuyan.
Kini human nga nakumpirmar ni PRO 7 Regional Director Police Brigadier General Debold Sinas nga aduna gayu’y gi-atiman si Bontuyan nga hearing dinhi sa dakbayan sa Sugbo.
Matud ni Sinas nga gipaabut na lang nila ang request sa Cebu City Police Office (CCPO) nga mag-umul ug SITG alang sa Bontuyan case.
Giangkun usab ni Sinas nga naglisud sila karun sa imbestigasyon gumikan kay wala may nakasaksi ug walay CCTV sa area.
Hinu-un, aduna silay nakuha nga dash cam sa taxi kung diin nahagba si Bontuyan ug ilaha na kini karun nga gisumitir sa Anti-Cyber Crime Group.
Samtang, gitataw usab ni Sinas nga andam ang PRO 7 nga muhatag ug 21 gun salute kang Bontuyan kung mu request ang pamilya niini.
