CEBU, CENTRAL VISAYAS — Nadakpan ang 213 ka drug suspects ug nasakmit ang P4M nga kantidad sa shabu sa usa ka semana nga anti-drug operations sa Central Visayas, sumala sa report sa Police Regional Office 7 (PRO7).
Gikan sa Marso 1 hangtod 7, gipakusog sa PRO7 ang operasyon sa tibuok rehiyon, nga nagresulta sa pagkadakop sa mga street-level ug high-value drug personalities, ug sa pagkasikop sa 586.70 gramos nga methamphetamine hydrochloride, nga nagkantidad ug ₱3,989,560, sumala ni Regional Director PBGEN Redrico A. Maranan.
Sa manhunt operations, nadakpan ang 131 ka wanted persons, lakip ang 32 ka most wanted individuals sa rehiyon.
Ang kampanya batok sa loose firearms misangpot sa 29 ka pagkadakop, samtang 40 ka armas, 2 ka eksplosibo, ug 101 ka bala ang nasakmit.
Samtang ang operasyon batok sa ilegal nga sugal nakaresulta sa 93 ka pagkadakop ug pagkabawi sa ₱11,651 nga kwarta.
Sumala pa sa PRO7, padayon ang intelligence-driven operations aron mapugngan ang krimen ug mapalig-on ang balaod sa tibuok Central Visayas.
