CEBU CITY- Gipahigayon ang engrande nga mass wedding sa 23 ka paresan sa Archdiocesan Shrine of Our Lady of Guadalupe dinhi sa Brgy. Guadalupe, Cebu City, karong Adlaw sa mga Kasing-kasing, Pebrero 14, 2026.
Ang maong kalihukan gi-organisar sa mga opisyales sa Barangay Kalunasan ubos sa pagpangulo ni Barangay Captain Carlitos Ceniza.
Matud sa kapitan, libre ang maong kasal ug ang tanang gasto, lakip na ang rehistrasyon, pre-seminar, mga singsing, ug ang reception giakon ug gisalo sa Barangay Kalunasan.
Dugang pa niini, kadaghanan sa mga nagpakasal dugay na nga nag-live-in apan walay igong kapasidad aron makapahigayon og pormal nga kasal.
Gihatagan og gibug-aton ni Ceniza nga kini ang unang higayon nga gihimo ang maong programa sa ilang barangay, ug iyang gipanglantawan nga ipadayon ug buhaton pag-usab kini sa sunod nga tuig.
Nanghinaot ang kapitan nga sa umaabot nga tuig mas daghan pang paresan ang makaapil, ilabi na nga karong tuiga kapin sa 130 ka paresan ang nagparehistro o nag-aplay, apan 23 lamang ang naka-kompleto sa tanang gikinahanglan nga requirements aron makapakasal.
Alang kaniya, ang Valentine’s Day dili lamang alang sa mga lovers, kondili simbolo usab sa gugma sa komunidad, usa ka pamaagi sa pagpakita sa iyang paghigugma ug pag-alagad sa mga konstituwente sa Barangay Kalunasan.
