Gibalhin sa Mexico ngadto sa Estados Unidos ang 26 ka mga piniriso nga giingong adunay importanteng papel sa gamhanang drug cartel sama sa Jalisco New Generation (CJNG) ug Sinaloa Cartel.
Sumala sa mga opisyal sa US, lakip sila sa “key operatives” nga nag-atubang sa mga kaso sa kapintasan ug organisadong krimen sa mga korte sa Amerika.
Giila sa Mexico ang mga binilanggo nga usa ka hulga sa seguridad sa publiko bisan tuod kadaghanan kanila wala hinganli, usa sa mga gibalhinan mao si Roberto Salazar, kinsa nalambigit sa pagpatay sa usa ka deputy sheriff sa LA County.
Ingon man ang usa ka babaye nga giakusahan sa pagpamaligya og drogas kaniadtong 2016–2017, apan dili klaro kung kauban ba siya sa 26.
Nasayran nga ang extradition gihimo sa kondisyon nga walay usa kanila ang mag-atubang sa silot sa kamatayon – usa ka palisiya nga dugay nang gihuptan sa gobyerno sa Mexico.
Bisan pa, kini ang ikaduha nga dagkong extradition karong tuiga, human sa 29 ka mga tawo nga gibalhin sa US kaniadtong Pebrero, lakip si Caro Quintero, ang giingong utok sa pagpatay sa DEA agent nga si Enrique ‘Kiki’ Camarena niadtong 1985.
Samtang, ang Presidente sa Mexico nga si Claudia Sheinbaum mihimakak sa mga taho nga ang Presidente sa US nga si Donald Trump mitugot sa mga ahente sa US sa pag-target sa mga lider sa kartel sulod sa Mexico, apan miinsistir nga ang kooperasyon tali sa duha ka nasud nagpadayon, ilabi na sa kampanya batok sa fentanyl trafficking.
