Nakabiya na Israel ang 26 ka mga Pilipino pinaagi sa voluntary repatriation program sa Embahada sa Pilipinas.
Matud ni Philippine Ambassador Aileen Mendiola ug ang DMW-OWWA team miuban kanila sa Allenby Border Crossing aron masiguro ang hapsay nga pagtabok gikan sa Israel paingon sa Jordan.
Gihikay usab sa embahada ang ilang transportasyon, transit visa, mga dokumento sa pagbiyahe, ug mga tiket sa eroplano.
Sa wala pa mobiya, ang mga Filipino nipuyo una sa usa ka puy-anan sa Department of Migrant Workers (DMW) diin gihatagan sila og mga relief packages, legal assistance, ug orientation alang sa ilang reintegration benefits sa ilang pagbalik sa Pilipinas.
Una na usab nga gitaho sa Department of Foreign Affairs (DFA) nga ang grupo naglangkob sa 26 ka mga overseas Filipino workers (OFWs) ug usa ka turista.
Samtang, ang ikaduhang batch sa repatriation, nga naglakip sa 33 ka mga Filipino, anaa na usab sa proseso.
Sa pikas bahin, wala pa y kasayuran kung adunay mga Pilipino nga naapektuhan sa pagpamomba sa US sa tulo ka mga lugar sa nuclear sites, sumala sa Department of Foreign Affairs (DFA).
Giasoy ni DFA Assistant Secretary Robert Ferrer nga dili klaro kung adunay mga Pilipino nga anaa sa mga naigo sa mga airstrike, apan gipahinumdoman ang mga Pilipino nga likayan ang mga pasilidad sa Iran.
