BOHOL PROVINCE – Gitumbok sa Bohol Provincial Police Office (BPPO) ang 27 ka mga lungsod sa Bohol nga posibleng mahimong hotspot sa eleksyon karong Mayo 9.
Matod pa sa tigpamaba sa BPPO nga si Zen Cheung nga duha ka lungsod sa probinsiya ang gibutang ubos sa red category, nga nagpakita nga kini nga mga lugarang grabeng gikabalak-an, samtang 19 ug unom ang giklasipikar ubos sa orange ug yellow nga kategorya.
Apan gitino ni Cheung nga datos palang kini sa ilahang buhatan ug e-validate pa kini sa Comelec.
Unang naobserbahan sa Comelec ang color-coded classification niadtong 2019 elections.
Matod sa Comelec, ang mga lugar nga giklasipikar ubos sa yellow adunay mga bayolenteng insidente sa miaging piniliay; ubos sa orange, nga adunay mga grupo nga armado ug rebelde; ug kadtong adunay duha ka mga kabalaka kay pula o red o “mga kritikal nga lugar.”
Samtang ang BPPO ug ang Philippine Army (PA) parehong nagpakatap og pwersa sa estado aron motabang sa pagpatunhay sa kalinaw ug kahapsay sa probinsiya.
Anaa na usab sa heightened alert ang 47th Infantry Battalion (IB) sa PA batok sa mga kalihokan sa New People’s Army ug uban pang armadong grupo.
Sa pagkakaron, wala pa silay namatikdan nga mga kalihukan sa mga armadong grupo nga mohimo og kapintasan nga may kalabotan sa eleksyon.
Nitabang usab ang 47th IB sa pagpatuman sa Comelec gun ban checkpoints sa tibuok probinsya.
