CENTRAL VISAYAS-Gimando sa Korte nga arestuhon ang anaa sa 27 ka mga sakop sa usa ka non-government organization sa Sugbo tungod sa giingong pagpondo sa mga rebeldeng komunista.
Kini human nga si Cebu City Regional Trial Court Executive Judge Marlon Jay Moneva nimando niadtong Mayo 14 sa pagdakop sa mga sakop sa Community Empowerment Resource Network Inc. (CERNET) tungod sa kalapasan sa Terrorism Financing Prevention and Suppression Act.
Ang CERNET gisuspetsahan nga naghatag og pundo sa Communist Party of the Philippines-New People’s Army sukad pa niadtong 2001.
Sa pakighinabi sa Bombo Newsteam kang Lt. Col. Israel Galorio, ang Public information office chief sa Visayas Command, gitino niini nga ang mga kaso gipasaka human makit-an ang probable cause base sa substantial evidence nga gihatag sa VISCOM, pinaagi sa Joint Task Group Cebu ubos sa 302nd Infantry Brigade sa Army niadtong Sept. 28, 2023.
Una nang namahayag ang commander sa VISCOM nga si Lt. Gen. Fernando Reyeg, nga ang kasundalohan sa kabisay-an kanunay nga usa ka lig-on nga tigpasiugda alang sa higpit nga mga lakang aron mabatukan ang terorismo ug ang financing niini.
Dugang pa ni Lt. Gen. Fernando Reyeg, nga ang legal nga aksyon batok sa CERNET nagtimaan sa usa ka kritikal nga lakang sa pagsiguro nga ang ang pag-apil sa ‘illicit financial activities’ mag-atubang sa bug-os nga gibug-aton sa balaod.
Sa pikas bahin, nipagawas usab ug pamahayag si Jaime Paglinawan, Chairman sa Bagong Alyansang Makabayan-Central Visayas (Bayan), ug usa sa mga akusado, nga walay basehanan ang pangangkon sa gobyerno nga gipondohan sa Cernet ang NPA.
Apan, kusganong gitino sa Visayas Command, nga adunay basihanan ang ilahang pagpasaka ug kaso, ug sukad sauna balik-balik na ang pamahayag sa mga akusado nga wala silay basihanan ug ang korte na ang mohatag sa desisyon.
