CEBU CITY — Emosyonal nga gihandum sa usa ka apohan ang kamatayon sa iyahang unom ka mga apo human nga natabunan sa pagdahili sa yuta sa Sitio Sindulan, Barangay Tinaan, dakbayan sa Naga, niadtong Setyembre 20, 2018.
Sa pagbisita sa Bombo News Team sa area, gisaysay ni Linda Capoy, 68 anyos, nga duha katuig na ang nakalabay apan susama nga sakit sa gihapon alang kaniya ang kamatayon sa iyahang mga apo nga giingong nagdako diha sa iyahang kiliran.
Matud ni Capoy nga gipakatawo kini ug nagdako sa naasoy nga dapit ug gumikan kay anaa usab sa iyahang nadak-an namatay ug gilubong ang iyahang ginikanan ug mga apo, hayan sa maong lugar na usab kini magpalubong ug sa ilahang payag kini magpahaya kung ugaling man nga kuha-on na kini sa Labaw nga Makagagahum.
Sigon pa sa naasoy nga Lola, nga kalit ang maong panghitabo hinungdan nga naglisod kini sa pagdawat hangtud karun, apan giingong gi-alam-alaman na lang niini ang iyahang kaugalingon arun nga magmalinawon usab ang kalag sa iyahang mga apo.
Gani, gipaambit pa niini nga gipadamgo kini sa iyahang mga apo nga susamang nangayo kaniya ug pagkaon, hinungdan nga ilaha kining gipamisahan ug giduaw sa minteryo.
Karung adlawa, isip paghandum nila sa ikaduhang tuig nga anibersaryo sa nahitabong trahedya, nagpahigayon kini sila ug gamay nga salo-salo sa pamilya, ingon man ang paghalad usab nila ug pag-ampo ngadto sa mga apo niini.
PAGLAUM HUMAN SA KASAKIT NGA GI-ANTUS
Gipasalamatan ni Naga Mayor Kristine Vanessa Chiong ang tanang mga stakeholders kinsang mitabang arun nga matukod ang mga 54 ka mga units alang sa mga nawad-an ug panimalay.
Gipahigayon usab ang santos nga misa isip paghalad ug pag-ampo ngadto sa mga mitaliwan sa maong insidente.
Bisan pa man sa makaguol ug makalilisang nga panghitabo sa kasaysayan sa lalawigan sa Sugbo, ang mga housing projects nga gitukod sa Sitio Tapon, Barangay Tinaan sa naasoy nga dakbayan, ang magsilbi nga tima-an sa bag-ong paglaum ug kahayag alang sa mga apektadong pamilya, ilabi na niadtong mga nawad-an ug kabanay, ingon man panimalay.
Isip tima-an sa paglaum human sa dili makalimtan nga trahedya, gitanom sa mga opisyal sa Naga ang punoan sa Narra.
Kahinumdumang 78 ka mga kinabuhi ang nakutlo human sa kalit nga pagdahili sa yuta niadtong Setyembre 20, 2018 sa kaadlawon. /reports by Bombo Crisle Adlawan and Bombo Eric Amaro/sbr/gn
