CEBU CITY-Nadakpan ang tulo ka babaye sa pagpangawat sa usa ka tindahan sa eskina sa dalan L. Gabuya ug dalan sa Cabreros, Barangay Basak San Nicolas ning dakbayan sa Sugbo, gahapong adlawa.
Giila ang mga suspek nga sila si Angel Ferrer Florentino, 28-anyos; Netchel Andrade Hilado, 33-anyos; ug Raquel Billos Bejemeno, 53-anyos nga mga susamang residente sa Silay City, Negros Occidental.
Nasayran nga dili lang kini ang unang higayon nga nangawat ang mga suspek tungod kay Kapila na usab kini nagbalik-balik sa maong tindahan.
Matud sa tag-iya sa convenience store nga si Melodina Vergara, nga nabantayan niini nga adunay mga nangawala nga tinda ug sa dihang gisusi ang ilang CCTV footage, ilang nakita ang lima ka mga tawo, lakip ang tulo nga nadakpan, nga nangawat sa iyang tindahan.
Nakita usab nila ang mga suspek nga nagbilin og dakong bag sa gawas sa tindahan.
Hinungdan nga nidangop ang biktima sa Mambaling Police Station ug sa gipahigayon nga follow-up operation sa kapulisan ilang nasakpan ang mga suspek nga nibalik sa tindahan aron sa pagpangawat pagbalik.
Gibisita usab sa kapolisan ang ilang giabangan nga boarding house sa Barangay Duljo Fatima, diin ilang narekober ang pipila ka mga butang nga gituohang kinawat.
Gawas sa mga kinawat, nakuhaan usab sila og illegal nga drugas.
Gani, dako ang posibilidad nga nagplano usab ang mga suspek nga mohimo og krimen atol sa 2024 Palarong Pambansa sunod buwan.
