CEBU CITY-Patay ang 3 ka lalaki human nga misukol atol sa buybust operation nga gipahigayon sa Talisay PNP sa Sitio San Lucas, Brgy Biasong Talisay City Cebu.
Naila ang mga napatay nga si Julie Sarte Daug-daug, subject sa maong operasyon ug ang mga kauban nga namatay nini mao sila si Anisito Sarte Daug-daug ug Vernabe Lastimosa Suello nga parehong hingkod na ang panuigon ug residente sa naasoy nga dapit.
Matud sa hepe sa Talisay PNP nga si Police Major Orlando Carag, nga nakuha nila ang tip nga aktibo sa pagduwa og iligal nga drogas ang subject sa ilang lugar pinaagi sa Purok leader sa naasoy nga lugar.
Nasuta nga nakipuyo ra kini sa balay sa iyang igsoon sa Brgy. Biasong apan sa kahadlok sa iyang igsoon nga maoy tag-iya sa balay sanglit matud pa daghang tao ang mag-adtoan sa ilang balay para sa iligal nga transaksyon, mihawa kini, hinungdan nga si Julie na ang nagpuyo sa maong balay.
Hinungdan nga gipahigayonan dayon kini sa kapulisan og buybust operasyon apan atol sa pinalitay, nakabantay matud pa kini nga pulis ang ilang katransaksyon hinungdan nga mibunot kini sa ilang mga armas ug
gipabuthan ang kapulisan.
Mibalos usab ang mga pulis sa pagpabuto ug naigo ang 3.
Gidala pa kini sa tambalanan apan gideklarar na kini sa doktor nga dead on arrival.Gani nakakuha pa og shabu ang doktor sa posesyon sa usa sa mga napulisan sa dihang gidala sa hospital.
Sa kinatibuk-an nakuha gikan sa mga napatay ang shabu nga dunay gibug-aton nga 35.42 grams ug mikantidad og 240,856 pesos.
Mipahimangno usab si Carag kinsang bago nga hepe sa Talisay nga dili sila muundang sa ilang operasyon ug taliwa sa ilang pahimangno ug duna gihapon ang muhimo og iligal nga aktibidad sana sa nahitabo sa 3 ang mahitabo usab kanila.
