Gibutyag ni Commission on Elections (COMELEC) Chairman George Erwin Garcia nga tulo sa top 15 nga project contractors nga gihisgutan ni Presidente Ferdinand Marcos Jr. ang giingong nihatag og donasyon atol sa kampanya sa ilang pagkandidato niadtong 2022 elections.
Matod ni Garcia, kining tulo ka mga kompanya nga wala pa hinganli kay nalakip sa listahan sa 31 ka mga kontraktor nga kasamtangang giimbestigahan sa COMELEC sa pakigtambayayong sa ilang Political Finance and Affairs Department (PFAD).
Dugang pa niini nga ang mga service contractors maapil usab sa ilang imbestigasyon ug dili lang sa pribado o government contractors ang tutukan.
Busa, ipadala sa poll body ang nasangpit nga listahan uban sa ilang inisyal nga imbestigasyon ngadto sa Kamara isip kabahin sa ilang padayon nga pagrepaso aron masiguro ang transparency ug integridad sa mga proyekto ug kontrata sa gobyerno.
Diin ang maong dokumento maglakip sa kantidad nga gihatag sa kontraktor ngadto sa kandidato ug kinsa nga mga kandidato ang gihatagan og pundo.
Kahinumduman nga gibutyag ni Presidente Ferdinand Marcos Jr., nga 100B sa kinatibuk-ang 545B nga pundo alang sa flood mitigation projects gikan Hulyo 2022 hangtod Mayo 2025 ang nahatag ngadto sa 15 lang ka mga kontraktor gikan sa 2,409 ka accredited contractors.
Apil niining 15 mao ang kompanya ni Lawrence Lubiano nga Centerways Construction and Development, Inc. nga kumpirmadong midonar og 30M alang sa kampanya ni Senate President Francis ‘Chiz’ Escudero sa 2022 elections.
