LAPU-LAPU CITY- Dili gihapon makatuo si Lapu-Lapu City Mayor Junard ‘Ahong’ Chan sa gidangatan sa duha ka menor de edad nga gikulata og lima ka babayeng susama niini nga menor de edad.
Gani, bisan paman sa pagdangop sa 3 sa 5 ka mga babayeng nangulata kay gisiguro sa opisyal nga mahatagan og leksyon ug makaamgo nga sayop ang ilang gibuhat.
Hinungdan nga gitugyan na kini ngadto sa City Social Welfare and Development Office ug mirekomendar nga ibutang ang mga menor de edad sa Homecare facility.
Samtang gipaubos na sa physical check-up ug stress debriefing ang duha ka mga gikulata arun mahupay ang ilang mga gibati nga trauma.
Una niini, nakita ni Mayor Chan ang video nga mikatap sa social media nga nahitabo niadtong Setyember 27 sa Maribago, Lapulapu.
Diin maoy hinungdan nga naghuot ang dughan ni Chan sa dihang gitabangan og kulata ang duha ka menor de edad sa usa ka grupo sa menor de edad.
Nangayo og tabang ang ginikanan nga mahatagan og hustisya ang pait nga nasinati sa ilang mga anak.
