CEBU CITY – Nabalhog sa prisuhan ang 3 ka gituohang mga durugista human nakuhaan og P3.4 million nga balor sa ginadiling drugas ug armas atol sa gipahigayon nga buybust operation sa Brgy. Carreta, Cebu City.
Giila ang gituohang bigtime drug personality nga si Ernesto “Baludoy” Ungos, 25 anyos, ug nagpuyo sa nahisgutang dapit. Samtang nasikop usab ang mga kauban niini nga silang William Banunot ug Arnel Abella.
Nasakmit sa mga sakop sa kapulisan ang tunga sa kilo nga gituohang shabu ug calibre 45 nga armas atol sa maong operasyon.
Matud sa hepe sa Mabolo Police Station nga si Police Major Dindo Alaras nga nagsugod sa pagpanulis si “Baludoy” ug nakasulod na kini sa illegal drug transaction sa dihang nahimamat niya ang usa ka drug lord.
Dugang pa ni Alaras nga dako ang disposal ni “Baludoy” matag semana. Kasamtangan pang gi-validate sa kapulisan ang tinubdan sa shabu nga nakuha gikan ni Alyas Baludoy.
Pasakaan silang 3 og kasong kalapasan sa Republic Act 9165 (kon Comprehensive Dangerous Drugs Act), illegal possession of firearms, ug violation of Comelec gun ban.
