Gisagol ang usa ka dako nga private investment fund nga nagkantidad og banabana nga $300 billion ngadto sa usa ka U.S.–Iran framework agreement nga nagtumong sa pagtapos sa gubat sa Middle East.
Matud sa usa ka tuburan nga adunay direktang kasayuran sa kasabutan, tinguha sa maong pondo nga dasigon ang Iran aron makab-ot ang hingpit nga kalinaw tali sa Estados Unidos ug sa maong nasod.
Kapin sa katunga sa maong kantidad ang gikatahong aduna nay komitment gikan sa nagkalain-laing kompanya sa Amerika, mga nasod sa Gulf, Asya, South America, ug Africa.
Tumong sa maong pondo nga mobubo og puhunan sa mga sektor sa enerhiya, transportasyon, manufacturing, ug logistics.
Subay sa report, kining gitawag nga “Reconstruction and Development Fund” dili mogamit og kuwarta sa gobyerno, kondili usa lamang ka private investment vehicle.
Lakip usab sa plano ang posibilidad sa pagpahulam ug pagpondo alang sa pagpalambo pag-usab sa mga imprastraktura sa Iran nga nangaguba tungod sa gubat, lakip na ang mga pasilidad sa industriya ug transportasyon.
Ang maong investment fund gikatahong lahi pa sa bulag nga panag-istoryahanay kalabot sa paglugak sa mga sanctions ug pag-access sa mga frozen assets sa Iran.
Samtang sa pagkakaron, wala pa’y opisyal nga kumpirmasyon ang kagamhanan sa U.S. kalabot sa maong investment fund.
