CEBU PROVINCE-Nihalad ang 300 ka dancing inmates sa Cebu Provincial Detention and Rehabilitation Center (CPDRC) ni Birhen sa Fatima sanglit sa adlaw nga natawhan usab ni Mama Mary, kagahapong adlawa Biyernes, Septembre 08, 2023.
Gipakita pag-usab sa mga ilado nga dancing inmates ang ilahang sikat nga mga dance moves.
Madasigon kini nga nagpatimbaya bisan paman naabtan og uwan sa tunga-tunga sa ilahang performance.
Ingon man nga mapasigarbon nga gipadayag ni CPDRC Provincial Warden Reynaldo Valmoria, nga kung si Cebu Provincial Governor Gwendolyn Garcia adunay Pasigarbo sa Sugbo siya aduna sab Pasigarbo sa CPDRC.
Gikan sa 4,000 kapin ka mga Persons Deprived of Liberty (PDL) nga naghuot sa maong edipisyo mikunhid na ang gidaghanon sa sakto nga kapasidad ngadto sa 926 ka dancing inmates mahitungod sa gihatag sa CPDRC niini nga pribilehiyo pinaagi sa Good Conduct Time Allowance (GCTA).
Matud pa ni Valmoria nga kung maayo ang mga inmates og performance sa sulod, mahatagan kini og GCTA, apan kung dili wala sab kiniy madawat.
Pinaagi sab sa virtual court hearing ug face-to-face court hearing mas madali ang ilahang kagawasan.
Gihimug-atan niini nga disiplinado ang mga inmates ug pinaagi sa maong pagsayaw adunay rehabilitation.
Itandi sa pag-gamit og drugas ug pagpanabako, diin gipangusgan sa maong warden.
