Pormal nang gitugyan ngadto kang Cebu City Mayor Nestor Archival Sr. sa buhatan sa Department of General Services (DGS) ERMM Complex sa South Road Properties (SRP) ang 300-kilowatt solar generation system nga adunay 462 ka solar panels niadtong Huwebes, Agosto 14, 2025.
Sumala pa ni Atty. June Maratas, ang Officer-in-Charge sa Cebu City DGS nga ang maong proyekto kay napundohan niadtong 2023 sa balor nga P30-milyones og gisugdan sa pag-implementar pag 2024.
Usa gi-instalar ang mga bag-ong solar panels sa maong building kay giilisan una ang mga karaang atop sa compound aron wala kadaot mamugna niini.
Gisugdan ang proyekto sa pagtukod og solar panels niadtong Hulyo 14, 2025, og sa pagsubay kay nakatigom na buhatan sa balor nga P78-milyones sa bayranan sa kuryente.
Gibana-bana nga ang maong solar panels kay makahatag og 60% sa gikinahanglang enerhiya sa compound pinaagi sa sidlak sa adlaw.
Matod ni Maratas nga importante ang pagpatuman sa renewable energy sa dakbayan gawas sa pagtuman sa mando sa balaod kay nakatabang pa kini sa kinaiyahan.
Kini ang labing unang higayon nga ang Kagamhanang Dakbayan sa Sugbo kay nakapa-implementar og usa ka solar generation system.
Atol sa maong ribbon-cutting ug system presentation, gipasalig ni Mayor Archival nga mas palapdan pa nila ang paggamit sa solar energy sa tanang pasilidad nga gidumala sa dakbayan.
Ingon man mipasalamat pud kini sa mga nakalabayng administrasyon sa pagsugod sa maog proyekto.
Giplano na karon sa dakbayan ang pagtaod og laing solar generation system sa Cebu City Legislative building sulod karong tuiga nga adunay konsumong 700 kilowatts (kW).
