CEBU CITY-Nawad-an og panimalay sa wala pa ang kapaskuhan ang 31 ka mga pamilya human mitumaw ang usa ka sunog sa mga panimalay nila sa dalan Gabuya, Sitio Apple, Barangay Cogon Pardo, ning dakbayan sa Sugbo sayong buntag niadtong adlaw sa Biyernes, Disyembre 6, 2024.
Subay sa inisyal nga imbestigasyon sa kabumberohan sa dakbayan nga mikabat sa dili muminos P750,000 ang balor sa naugdaw nga mga kabtangan diin 16 ang totally damaged samtang 5 ang partially damaged nga nakaapekto sa 132 ka mga indibidwal sulod sa 31 ka mga pamilya.
Dugang pa nga nagsugod ang maong sunog sa panimalay sa usa ka Rosaleah Parajes Payao diin milangtod sa 30-minutos ang pag-pawng sa maong sunog.
Maayo nalang og walay naangol sa maong panghitabo gani pasalig ni Cogon Pardo Barangay Captain Harry Eran sa mga biktima sa sunog nga mudalit gayud sa daling hinabang ang lokal nga kagamhanan atol sa eksklusibong pakighinabi nii sa Bombo Newsteam.
Kasamtangang midalit na og hinabang ang kagamhanang lokal sa mga biktima sa sunog aron makabangon sa kalisod nga ilang nasinati.
