CEBU CITY-Patay ang usa ka 33-anyos nga babaye human kini gituohang natagak gikan sa ika-16 nga andana sa usa ka building sa Cebu Business Park sa Uptown Cebu City, adlaw sa Biyernes Setyembre 20, 2024.
Daling girespondihan sa mga awtoridad ang maong dapit aron sa pagsusi sa maong panghitabo.
Matod pa ni Police Major Romeo Caacoy, ang hepe sa Mabolo Police Station nga gideklarar nga “dead-on-the-spot” ang biktima tungod sa katas nga gitagakan niini.
Atol sa inisyal nga imbestigasyon, giila ang biktima nga usa ka dalaga nga abogada nga lumulupyo sa Barangay Pajo, dakbayan sa Lapu-Lapu.
Dugang pa ni Major Caacoy nga temporaryong dili usa nila ibutyag ang pangalan sa biktima aron sa paghatag og pribasiya sa kabanay sa abogada.
Padayon ang imbestigasyon sa mga awtoridad sa maong panghitabo nga pipila sa mga gipanglawntawan niini nga motibo kay ang pagkutlo sa kaugalingog kinabuhi (suicide) o kalambigitan sa dili maayong pagbayloay (foul play) tungod sa iyang “nature of profession”.
