Gipusil ang usa ka 35-anyos nga mag-uuma sa iyang kaubang mag-uuma sa Barangay Cantularoy, Sibonga, Cebu, mga alas 7:33 sa gabii niadtong Biyernes, Agosto 14.
Ang biktima giila nga si, alyas “Raymond,” residente sa Purok 1, Barangay Cantularoy, samtang ang suspek giila usab nga si, alyas “Eloy,” 22, taga Barangay Duguan, Sibonga.
Sumala sa Sibonga Municipal Police Station, nakadawat sila og report gikan sa usa ka concerned citizen bahin sa pagpamusil.
Base sa mga impormasyon, nga si Raymond naglakaw sa iyang bitbit iyang kabaw padulong sa usa ka sibsibanan sa dihang giingong gipusil siya ni Eloy nga walay klarong hinungdan.
Gikataho nga ang suspek mipusil sa makadaghang higayon gamit ang wala matino nga kalibre sa armas, nga naigo sa wala nga bukton ni Raymond. Hinungdan nga dali kining gidala sa Carcar District Hospital alang sa pagtambal.
Nasayran sa pulisya nga si Eloy giingong nasuko kang Raymond human gisultihan sa ulahi ang iyang amahan nga mopasaka siya og reklamo batok kaniya sa barangay. Ang reklamo gikataho nga naggikan sa wala pag-uli sa amahan sa iyang gihulam nga motorsiklo.
Padayon ang pagpangita sa mga awtoridad kang Eloy, kinsa miikyas human sa pagpamusil.
