CEBU CITY-Mokabat sa 35 ka pamilya o 128 ka indibidwal gikan sa 32 ka panimalay sa Purok Riverside, Barangay Cantao-an, dakbayan sa Naga ang napugos sa pagbiya tungod kay nakaangkon og mga liki ang bakilid sa bukid sa duol.
Ang Kagamhanan sa Dakbayan sa Naga gitambagan sa Mines and Geosciences Bureau (MGB) nga temporaryong papahawaon ang mga tawo tungod sa posibilidad sa pagdahili sa yuta nga mabutang sa peligro sa ilang kinabuhi.
Nihimo ang MGB sa rekomendasyon human sa pagsusi sa lugar uban sa hepe sa Naga City Police Station nga si Lieutenant Colonel William Homoc, Engr. James Generale gikan sa City Environment and Natural Resources Office (CENRO), Pronie Ubas gikan sa City Disaster Risk Reduction and Management Office.
Nasayran atol sa ilang survey nga kon mahitabo ang pagdahili sa yuta, malubong sa mga bato ang mga lumulupyo ug ingon man ang Metro Cebu Expressway nga padayon pang gitrabaho.
Ang unang batch sa mga bakwit mibiya sa lugar sa katapusan sa Septyembre, ug ang ikaduhang batch mibiya sa sayong bahin sa Oktubre.
Giangkon ni Generale nga una niyang nakit-an ang pagkabuak sa bakilid sa bukid sa katapusan sa Septyembre, apan hangtod karong bulan sa Oktubre nga kini midako.
Tungod niini, nangayo sila og tabang sa MGB.
Ang mga apektadong residente temporaryo nga gipapuyo sa Cantao-an Elementary School, ug ang kagamhanan sa dakbayan mo-supply usab kanila og pagkaon ug tubig.
