ARGAO, CEBU-Napasaka na ang reklamong parricide batok sa 37-anyos nga lalaki kinsang giingon nga nidunggab-patay sa iyang kaugalingong apohan niadtong Abril 14 sa balay sa biktima sa Sitio Alang-alang, Brgy. Bogo sa lungsod sa Argao, habagatang Sugbo.
Giila sa kapulisan sa Argao ang suspek nga si Weldrin Lovitos, kinsang gitudlo nga caretaker sa iyang apohan nga si Sancho, nga nag-edad og 82-anyos.
Matud pa ni Police Senior Master Sergeant Benjie Garcia, imbestigador sa Argao Police Station, nga usa sa mga anak ni Sancho nakadungog sa pagsiyagit sa tiguwang hinungdan nga iyang gisusi ang iyang amahan sa usa ka barongbarong nga mao’y gipuy-an niini.
Sa dihang gisusi sa iyang anak si Sancho, iyang nakita si Weldrin nga nigawas sa balay samtang nagkupot og duha ka kutsilyo nga nagkadugo.
Nakita usab sa anak ang amahan niini nga nagbuy-od sa kaugalingong dugo gumikan sa mga samad dinunggaban sa iyang likod, dughan ug mga kamot.
Sa ilang imbestigasyon, si Weldrin nitug-an sa kapolisan nga ang iyang apohan maoy unang miatake kaniya apan, wala’y makita ang mga imbestigador og mga samad dinunggaban sa iyang lawas.
Matud pa ni Garcia nga adunay mga kabanay nga nitug-an kanila nga adunay sakit sa pangisip ug kinahanglan niini ang iyang injection arun mapakalma kini ug giingong posible nga mao kini ang nakaaghat ni Weldrin sa paghimo sa krimen.
