CEBU CITY-Patay ang usa ka 4-anyos nga batang lalaki human nga natagak dayon nalumos sa sapa sa Sitio Tal-ot, Barangay Inayawan ning dakbayan sa Sugbo niadtong adlaw sa Dominggo Hunyo 30, 2024.
Nasuta nga sa wala pa ang panghitabo ang maong batang lalaki kay nagdula sa usa ka taytayan sa sapa duol sa ilang panimalay sa dihang natagak dayon naugbok ang ulo sa semento.
Gibana bana nga dose ka talampakan ang gitas-on sa natagakan sa maong bata gikan sa taytayan nga giduwaan niini.
Sa pakighinabi sa Bombo News Team kang Andrica Paraiso, kinsa apohan sa biktima nga matod niya wala nila nabantayan ang lihok sa iyang apo og namatikdan nalang kini sa ilang silingan pipila ka oras ang milabay nga naglutaw ang lawas sa sapa.
Daling gidala sa Cebu City Medical Center ang biktima apan gideklarar dayon kini ng dead upon arrival.
Walay nakita nga foul play ang hinungdan sa maong insidente.
