BOHOL PROVINCE – Gikumpirmar ni Bohol Governor Edgar Chatto nga upat ka mga sakop sa Abu Sayyaf ang napatay sa mga tropa sa gobyerno sa nahitabong engkwentro sa Sitio Lagsing, Clarin, Bohol kagahapon sa hapon.
Kini basi na usab sa gipahigayon nga retrieval operation nga gipahigayon sa mga sakop sa Scene of the Crime Operatives (SOCO).
Matud ni Governor Chatto nga adunay laing tulo karun ka mga sakop sa ASG ang gipangita sa mga otoridad apan
giingong usa na lang ka armas ang dala niini.
Gihulagway pa sa gobernador nga luya na ang maong mga ASG gumikan kay gawas nga wala na ang leader
ug sub-leader sa maong grupo giingong wala na usab kini kaon.
Sigon pa ni Chatto nga gipaningkamotan sa mga otoridad nga daling mahuman ang clearing operation sa area subay na usab sa kamandoan ni Presidente Rodrigo Duterte nga humanon kini ‘as soon as possible’.
Direktiba niya karun sa ubang kalungsoran sa Bohol nga magpabiling magbinantayon sa palibot ug daling musumbong sa otoridad kung adunay kadudahang mga tawo nga musulod sa ilahang tagsa-tagsa ka mga area.
Samtang giklaro ni Governor Chatto nga wala matandog ang turismo sa probinsiya ug gani nagpuno pa ang mga resorts og mga guests.
Hinuon, giangkon niini nga adunay mga cancellation sa bookings apan dali ra man usab kini nga mapulihan.
Matud pa sa gobernador nga padayon ang pagdagsa sa mga turista, lokal man o langyaw sa probinsiya sa Bohol.
Subay niini, iyahang giwagtang ang kabalaka sa publiko ilabi na sa mga gustong mubisita sa Bohol ug sigon pa nga dili man ang kinatibuk-ang probinsiya ang gisudlan sa mga Abu Sayyaf.
Giawhag na lang sa gobernador ang mga Bol-anon nga magpabiling kalmado apan mag-igmat sa gihapon sa palibot.
