Hilabihan nga nakapahuyang sa sitwasyon sa mga health systems sa Gaza ang padayon nga presensya ug mga operasyon-militar sa Israel sa maong dapit.
Kaylap na ang force evacuation sa maong lugar ug halapad nga grabeng kakuwang sa suplay sa pagkaon, tubig, tambal, produktong gasoline, ug tarong nga kapuy-an ang nasinati sa kinabag-an sa populasyon.
Upat ka dagkong mga ospital sa Gaza ang mihunong sa operasyon sa miaging semana tungod sa ilang kaduol sa mga lugar sa panagbangi, samtang 28 nga pag-atake sa mga pasilidad sa kahimsog ang natala sa kini nga panahon.
Anaa sa napulo’g siyam (19) lamang nga mga ospital sa Gaza Strip ang nagpabiling abli, apan naglisud tungod sa kakulang sa suplay, kakulang sa kawani, ug nagpadayon nga mga hulga sa seguridad, samtang 94% sa mga ospital sa lugar ang nadaot o naguba na.
Ang bag-ong mga mando sa pagbakwit mahimong mosangpot sa permanenteng pagkawala sa mas daghang pasilidad sa panglawas, ilabina sa amihanan ug habagatang Gaza, diin daghang mga ospital ug mga sentro sa pag-atiman ang nahimutang sa mismong dapit o duol sa mga apektadong lugar.
Ang pagpakig-away ug presensya sa militar nagpadayon nga nakababag sa pag-access sa mga pasyente sa medikal nga pag-atiman, ingon man ang katakus sa World Health Organization (WHO) ug uban pang mga organisasyon sa pag-resupply sa mga tambalanan.
Busa ang WHO nanawagan alang sa pagpanalipod sa pag-atiman sa panglawas ug sa dinaliang pagpatuman sa usa ka ceasefire.
