CEBU – Upat ka mga Korean national ang nasikop human nasuta nga nagpahigayon og ilegal nga operasyon sa Philippine Offshore Gaming Operators (Pogo) sa usa ka condominium sa dakbayan sa Sugbo.
Ang operasyon gihimo gahapong adlawa, Agosto 5 pinaagi sa search warrant.
Gilusad sa mga sakop sa Criminal Investigation and Detection Group (CIDG) Regional Field Unit, ug sa CIDG-Lapu-Lapu, ang usa ka condo unit sa Barangay Lahug nga miresulta sa pagkasikop sa Koreano.
Giila ni Police Captain Nigel Sanoy, ang officer-in-charge sa Criminal Investigation Group Lapu-Lapu Field Unit, ang mga suspek nga sila si Taewoong Kang, 42; Jung Ho Won, 41; Kim Dae Hyeon, 36, ug Park Ji Sung, 40, pulos lumad nga taga South Korea apan kasamtangang nagpuyo sa usa ka condominium sa Barangay Lahug, dakbayan sa Sugbo.
Dugang pa, nga duha ngadto sa tulo ka tuig na silang nagsugod sa maong ilegal nga kalihokan.
Gawas sa ilegal nga POGO o online gaming, nalambigit usab sila sa mga scamming activities, ug pagbiktima sa mga Korean national.
Giingong minilyon ang kita sa mga suspek matag adlaw gikan sa ilang mga biktima.
