CEBU CITY – Gipanglantawan na ang upat ka mga local government units (LGUs) sa Cebu nga ipaubos sa alert level 1 tungod sa taas niini nga vaccination rate.
Base sa taho, kung basehan ang sa grupo sa mga senior citizen ga nabakunahan, nakatala ang Mandaue City og 91-percent rate; Minglanilla, 80 ; Talisay City, 77 ; ug Cordova, 73.
Apan matod ni Department of Health (DOH) Central Visayas chief pathologist, Dr. Mary Jean Loreche, kinahanglang paspasan sa dakbayan sa Sugbo ang pagpamakuna tungod anaa pa sa 66.17 porsiyento sa target population ang nakab-ot samtang 70% ang gi-required.
Gipasabot ni Loreche, nga ang upat ka lugar nga gipanglantawan nga ipaubos sa Alert Level 1 naka-comply sa matrix sa Alert Level status.
Sulod sa maong matrix kinahanglan ang usa ka lugar aduna nay: 70% fully vaccinated sa ilahang total eligible population, 80% sa mga senior citizen ang nabakunahan, gamay na lang ang aktibong kaso sa Covid-19 ug kinahanglan ubos 50% lang ang nagamit sa hospital o ubos sa 50% nalang ang capacity utilization.
Sa tibuok rehiyon sa Central Visayas, ang Siquijor lamang ang gipaubos sa Alert level 1 samtang ang ubang probinsya anaa sa level 2 hangtod Marso 15.
