CEBU CITY– Migawas sa imbestigasyon sa Police Regional Office 7 nga gikulata ug gi-torture una gipatay ang upat ka mga intelligence personnel sa Regional
Mobile Force Batallion (RMFB) didto sa Sitio Ilaya Yamot, Barangay Makabato sa Ayungon, Negros Oriental.
Gisaysay ni PRO 7 Regional Director Police Brigadier General Debold Sinas nga gipaluhud, gihikut ang mga kamut sa luyu, gikulata ug dayun gi-ulo pagpusil sila si Police Corporal Relebert Beronio, Police Patrolman Raffy Caliao, Police Patrolman Roel Cabillion ug Police Patrolman Marquino De Leon.
Dugang pa ni Sinas nga paghuman ug patay sa mga rebeldeng grupu, gikuha ang mga personal nga gamit sa mga pulis sama sa cellphone, ingun man ang mga armas.
Matud pa nga gibana-banang mukabat sa 30 ngadtu sa 40 ka mga sakup sa Central Negros Group-NPA ang mi-atang ug mipatay sa nahisgutang mga sakup sa RMFB.
Basi sa autopsy nga sa SOCO, nakita nga anaa sa ibabaw ang entry sa bala ug gituhu-an nga maoy hinungdan sa kamatayun sa upat ka mga bagito nga pulis.
Una niini, giingung nagtakuban ang upat ka mga pulis isip mga trabahante sa foresty diin nagdala pa kini ug mga seedlings apan gituhu-an nga nakabantay ang mga sakup sa NPA hinungdan gi-atangan niini ang mga nahisgutang otoridad.
Wala na usab makasukul pa ang upat ka mga namatay nga pulis human nga nakalitan sa pagtumaw sa mga NPA.(SBR)
