Cebu City- 4 ka mga tawo ang namatay sa nahitabong pagpamusil sa Sitio Ranger Brgy Ranger, Brgy Pooc Dakbayan sa Talisay.
Matud ni Pollice Supt Marlo Conag, hepe sa Talisay City PNP nga pasado 12:30 ganihang udto sa dihang nakadawat sila ug report nga dunay nahitabong pagpamusil sa maong dapit.
Sa pagrespondi sa kapulisan nakita nalang nga nagbuy-ud na ug naligo sa ilang kaugalingong dugo ang tulo ka mga lalaki nga sakay sa usa ka gray nga KIA sorrento nga dunay plate number nga GDU 934.
Natusak-tusak sa igo sa bala ang maong sakyanan.//Pipila ka metros gikan sa gikahimutangan sa sakyanan, napalgan usab ang patayng lawas sa usa ka babaye nga giila kang Cresensiana Rangos, 50 anyos , usa ka basurera.
Usa sa mga napatay ang giila usab sa iyahang ig-agaw nga si Dennis Patilona samtang ang usa ang giila usab nga si alyas Micmic. Hinuon sa pagkakaron dili pa makumpirmar sa kapulisan kung mao ba kini si PO2 Micahel Cortez kinsang nalakip sa listahan ni Presidente Rodrigo Duterte sa mga narco cops.
Samtang gibutyag usab sa usa sa mga residente sa Sitio Ranger nga pasado alas dose ganihang udto sa dihang nakadungog sila ug sunud sunud nga buto.
Nakita matud pa ang duha ka mga lalaki nga naggukod sa sakyanan sa mga biktima samtang padayon ang pagsinukliay ug buto.
