CEBU CITY-Dili mominus sa 27 ka mga panimalay ang naigo sa miulbong sunog sa Sitio Sayco, Barangay Basak San Nicolas ning dakbayan sa Sugbo, Huwebes, Hunyo 27, 2024.
Diin sa naasoy nga ihap, 6 niini ang partially burned ug 21 ang hingpit nga naugdaw.
Ingon man nga mokabat sa P2.1 milyones ang danyos sa mga kabtangan sa sunog ug adunay usa ka indibidwal nga nakaangkon og second degree burns sa iyang mga bukton kinsang giila nga si Michael Corpuz, 44-anyos.
Basi sa taho nga nagsugod ang sunog sa balay nga gipanag-iya ni Edwin Tamara.
Matod sa mga otoridad nga mokabat sa 40 ka pamilya o anaa sa 108 ka indibidwal ang nawad-an sa pinuy-anan sa maong sunog.
Giisa sa kabomberohan ang unang alarma alas 5:19 sa hapon, dayon giisa kini sa ikaduhang alarma alas 5:30 sa hapon ug nakontrolar ang sunog alas 5:58 sa hapon. ug gideklarar nga fire out alas 6:26 sa gabii.
Sa pagkakaron, nagpadayon pa ang imbestigasyon kon unsay hinungdan sa sunog.
