Nagbilin og dakong kaguol ug danyos ang usa ka dakong sunog nga niulbo gabii, Mayo 16, diin 75 ka mga panimalay ang gilamoy sa kalayo sa Barangay Tejero, ning dakbayan sa Sugbo.
Lakip sa daling girespondihan sa mga bombero mao ang dapit sa Sitio Silangan, diin paspas nga nikatap ang kalayo ngadto sa mga tapad nga sitio tungod sagad sa mga balay ginama sa light materials.
Basi sa inisyal report, nagsugod ang sunog alas 7:05 sa gabii, 80 ka pamilya o gibana-bana nga 240 ka mga indibidwal ang nabulabog sa sunog.
Diin sa mga naapektuhan nga balay, 65 ang gikataho nga hingpit nga naugdaw samtang 10 ang nakaangkon og partial nga kadaot, ug gibana-bana nga mokabat og P2,250,000 ang danyos.
Personal usab nga niduaw sa lugar si Mayor Nestor Archival uban ni Konhal Nice Archival aron sutaon ang kahimtang sa mga naapektuhang pamilya ug pagsiguro nga mahatagan dayon sila og dinalian nga tabang sama sa pagkaon, tubig, ug temporaryong kapasilungan.
Sa pikas bahin, dead on the spot ang usa ka Fire Volunteer sa Cebu City human kini makaangkon og grabeng kadaot sa iyang ulo human madisgrasya sa may Ouano Avenue sa Dakbayan sa Mandaue gabii.
Diin gikatahong paingon kini nga moresponde sa sunog nga miulbo sa Barangay Tinago, Dakbayan sa Sugbo, apan nadisgrasya kini ug miresulta sa iyang kamatayon.
