CEBU CITY-Mukabat sa 430 ka mga police personnel sa Cebu City Police Office (CCPO) ang ipakatap alang sa umaabot nga semana santa.
Gipahibalo ni Police Colonel Ireneo Dalogdog, ang director sa Cebu City Police Office, nga nakasumitir na ang mga station commander gikan sa 11 ka mga police stations sa syudad sa ilahang mga security deployment plan, diin adunay mga mihangyo ug augmentation alang sa ilahang area of responsibility (AOR).
Kini ang police station 6 (Sawang Calero Police Station) ug station 9 (Guadalupe Police Station), diin ma-igo kini sila sa dakong kalihokan ilabi na sa Biyernes Santo, ang Buhing Kalbaryo, hinungdan nga dugang police forces ang ilahang gikinahanglan.
Matud ni Dalogdog nga ilaha kining ikonsiderar, apan ilaha usab nga gilantaw pag-ayo ang deployment nga dili malaktawan ang uban pang mga aktibidad.
Gawas sa mga simbahan ug mga suroyanan sama sa Good Sheperd ug Tabor Hills, kay bantayan usab sa kapulisan ang mga pantalan, terminal, kamerkadohan ug mga mall, diin ilahang gitinguha nga makita gayud ang presensya sa mga pulis arun nga dili mag-malampuson ang mga lawless elements sa ilahang mga dautang plano.
