CEBU CITY — Mapasigarbuhong gipahibalo ni Cebu Provincial Governor Gwendolyn Garcia nga mabalik na gayud ang “Pasigarbo sa Sugbo” human sa unom ka tuig nga paglurang.
Ubos sa maong event nga giila isip “festival of festivals” sa Sugbo, subling magtigi ang mga kalungsuran ug mga syudad sa lalawigan aron ipasundayag ang kaanindot sa mga local festivals.
Pagasalmutan kini sa 45 ka mga contingents ug ipahigayon ang maong panagtigi karong Agosto 25 sa Cebu City Sports Center.
Matud ni Gov. Garcia nga nagkasinabot na sila daan ni Cebu City Mayor Edgar Labella sa venue ug nakahan-ay na usab ang budget alang sa kalihukan human nga mipasar ang provincial board og supplemental budget alang sa subsidy sa mga contingents na nagagikan pa sa tagsa-tagsa ka mga local government units.
Nagmapasalamaton na daan si Garcia sa suporta ug sa partisipasyon sa mga LGUs bisan pa man sa kalayo niini sama lang sa San Francisco, Poro, Bantayan, Madridejos, ug Sante Fe.
