Luwas ang usa ka 46-anyos nga lalaki human kini nakuryentehan sa Cabangtan St., Barangay Luz.
Giila kini nga si Oliver Prajes kinsang nakaangkon og “second-degree burns” sa iyang nawong, apan dili na siya anaa sa peligro.
Sumala sa pahayag ni Ferl Pacaldo, Response Operation Head sa Cebu City Disaster Risk Reduction and Management Office (CCDRRMO), ang biktima nagtaod og kisame sa dihang naigo sa iyang gihuptan nga metal furring ang primary line sa poste sa kuryente, hinungdan sa iyang pagkakuryente.
Paspas nga naka-responde ug nakapahigayon og rescue operation ang mga sakop sa Barangay Responder, Bureau of Fire Protection, ug ang Special Rescue Squad sa CCDRRMO aron maluwas ang biktima.
Dugang ni Ferl Pacaldo, nga nakasinati og gamay nga pagkalangan ang operasyon sa pagluwas tungod sa kapiot sa lugar ug sa kadaghan sa mga tawo nga nagtan-aw. Bisan pa niini nga mga hagit, ang biktima daling gidala sa ospital uban ang tabang sa Cebu City Ambulance Team. via Bombo Rocky Lavarez
