CEBU CITY- Nabalhog sa prisohan ang usa ka lalaki nga nibisita sa Mabolo Police Station nga milukat og National Police Clearance, kini human nahibaw-an sa kapulisan nga aduna kini pending nga warrant tungod sa kasong murder, usa ka non-bailable offense.
Giila ang maong gidakop nga si Elberto Maxino Carriaga, 48-anyos, lumad nga taga Tanjay sa Negros Oriental ug kasamtangang nagpuyo sa Sitio Langub sa Brgy. Guadalupe, dakbayan sa Sugbo.
Nasuta nga ang warrant giisyu ni Judge Candelario Gonzalez sa Branch 45 sa Regional Trial Court sa Bais City niadtong Enero 19, 2010.
Nabuhat niya ang iyang krimen niadtong 2009, ug nibiya siya sa Bais City ug nibiyahe sa Cebu City aron motago.
Ni-aplay og trabaho si Maximo ug gi-require sa iyang amo nga mokuha og police clearance hinungdan nga nibisita siya sa Mabolo Police Station niadtong Martes.
Apan, wala siya masayod nga ang impormasyon sa warrant sa pagdakop kaniya nakita na sa sistema sanglit ang police clearance system kay konektado sa E-Warrant system.
Kasamtangang gitanggong sa detention facility sa Mabolo Police Station si Carriaga hangtod ning pagsuwat.
