Nagpabiling apektado ang 48 ka probinsiya sa tibuok Pilipinas sa African Swine Fever (ASF), basi sa pinakaulahing report sa Bureau of Animal Industry (BAI).
Ang report sa National ASF Prevention and Control Program nagpakita nga tulo ka probinsya sa Ilocos, 5 sa CAR, 4 sa REgion 2, 6 sa Central Luzon, 4 sa Calabarzon, ug 3 sa Mimaropa ang apektado sa ASF.
Samtang lima ka probinsiya sa Bicol Region; 5 sa Western Visayas, 3 sa Central Visayas, 4 sa Eastern Visayas, 2 sa Zamboanga peninsula ug Northern Mindanao, 5 sa Davao, 2 sa Soccsksargen ug 5 sa Caraga.
Lakip sa mga epekto sa ASF sa nahisgutang mga rehiyon, ang BAI niingon nga aduna nay 453 ka mga siyudad ug lungsod nga anaa sa pink area o buffer zone category.
Mokabat sa 99 ka mga lungsod ang gideklarar nga yellow o surveillance zones ug gimonitor sa mga awtoridad.
Siguruhon sa BAI nga magpadayon kini sa paghimo og mga lakang aron mabantayan ang mga lugar sa tibuuk nasud nga luwas gikan sa ASF ug dili kini maapektuhan.
Ang DA ug ang Department of Health (DOH) nipirma kaniadto og memorandum of agreement (MOA) diin ang BAI moabag sa Food and Drugs Administration (FDA) sa pag-ila sa mga bakuna ug tambal nga makatabang sa mga binuhing hayop sa nasud, apil na ang mga baboy.
