CEBU CITY — Mipasalig ang Department of Health (DOH)-7 sa publiko nga adunay kapasidad ang Bureau of Quarantine ug mga local health units taliwa sa gikabalak-ang corona virus gikan sa Wuhan, China.
Kini ang nahimong pamahayag ni DOH-7 Director Dr. Jaime Bernadas human gipaubos sa imbestigasyon ang usa ka 5-anyos nga bata kinsang gikatahong nagpositibo sa wala pa matinong corona virus.
Matud ni Bernadas nga nasayud nang daan ang BOQ, mga health units sa rehiyon, lakip na ang mga tambalanan sa mga protocols kalabot na sa gikahadlukang virus.
Dugang pa niini nga gipatuman ang heightened surveillance sa mga pantalan ug tugpahanan sumala pa sa order ni DOH Sec. Francisco Duque III.
Gibutyag usab ni Bernadas nga miabot sa Sugbo ang batang Chinese niadtong Enero 12 gikan sa Guangzhou, China ug nagagikan ang ginikanan niini sa Wuhan City.
Human namatikdan sa mga sintomas sama lang sa pag-ubo, nadala kini sa tambalanan ug gipaubos kini sa laboratory samples.
Sa kasamtangan, nagpabiling isolated ang 5-anyos nga bata ug anaa kini sa usa ka medical facility sa dakbayan sa Sugbo samtang nagpaabot pa sa lab test results gikan sa Australia.
‘Pakusgan ang resistensya’
Mipahimangno ang DOH-7 sa katawhan nga magpabiling himsog aron makalikay sa mga grabe nga balatian sama na lang sa gikahadlukang corona virus.
Kini subay na sa corona virus nga gikan sa Wuhan, China ug human nga niabot sa Sugbo ang 5-anyos nga gikatahong nataptan niini.
Padayon nga nipahimangno si Dr. Jaime Bernadas kinsa Regional Director sa DOH 7 nga paninguhaon gayud nga magpabiling himsog ug pagbaton ug balanced diet aron dili dali mataptan ug sakit.
Nipahimangno usab kini nga likayan ang pag-adto sa bagang duot sa tao ug mga airport.
Dugang pa nga tambag ni Bernadas sa publiko nga kun ugaling mabatian ang mga sintomas sama sa trangkaso, magpakonsulta dayon sa espesyalista aron matambalan o mahatagan og igong pagtagad.
‘Walay angayang ikabalaka’
Giklaro sa usa ka eksperto nga dili angayang ikabalaka ug ikahadlok ang coronavirus inay palig-onon ang resistensya.
Matud ni Dr. Rene Josef Bullecer nga ang sintomas niini susama lang sa mga sintomas sa trangkaso.
Gikinahanglan gayud nga sakto sa pahuway ug sakto ug kaon gumikan kun ugaling mataptan niini dali ra nga maka-rekober.
Dugang pa ni Bullecer nga angay gayud kining iklaro sa DOH-7 nga dili kini makamatay aron dili mag-panic ang katawhan.
Makuha ang corona virus pinaagi sa droplets susama sa laway. (gn/lq)
