CEBU CITY-Napa-ig ang usa ka 5 anyos nga batang lalaki human nga na trap sa ilahang panimalay nga gika-on sa kayo kaganihang buntag sa Sitio Agus Proper, Barangay Agus, dakbayan sa Lapu-Lapu.
Giila ang maong bata nga si Mon Harry Anhao kinsang nag-inusara sa ilahang panimalay sa dihang nahitabu ang sunog.
Una niini, pasado alas 9 kaganihang buntag, mitumaw ang kayo kung diin anaa sulod sa panimalay ang bata kinsang gibilin sa iyahang ginikanan nga giingung naninda sa usa ka carenderia.
Nasayran nga adunay gilay-un ang distansya sa panimalay niini ug ang tindahan hinungdan nga bisan pa man nga nagdali-dali ang ginikanan sa pag-abut sa nagkayo nga panimalay wala na gayud nila naabti nga buhi ang ilahang anak.
Sa pagsusi sa mga bombero sa Bureau of Fire Protection (BFP) Lapu-Lapu, nakaplagan na lang ang napa-ig nga lawas sa bata sa katapusan nga bahin sa hagdanan sa panimalay.
Gituhu-an nga misulay pag-eskapo ang bata gikan sa misila-ub niini nga panimalay.
Sa pagkakarun, gisuta sa fire investigator ang gigikanan sa sunog ingun man ang danyos nga namugna sa maong insidente. (SBR)
