Nasikop ang lima ka indibidwal sa duha ka managlahing operasyon batok sa ilegal nga droga nga gipahigayon sa Philippine Drug Enforcement Agency-7 (PDEA-7), uban ang tabang sa Cebu Provincial Police Office, niadtong Setyembre 29.
Gibutyag sa PDEA-7 nga ang mga operasyon miresulta sa pagkasakmit sa gituohang shabu nga adunay kinatibuk-ang gibanabanang kantidad nga P742,360.
Diin ang pinakaulahing operasyon gipahigayon sa Purok Tambis, Sitio Litmon, Barangay Dumlog, Siyudad sa Talisay, sa usa ka lugar nga giila sa PDEA nga gituohang drug den nga miresulta sa pagkasikop sa tulo ka suspek.
Sumala sa PDEA-7, ang managsuon gituohang naabtan sa sulod sa drug den samtang naggamit og shabu. Matod sa mga awtoridad, nakasakmit sila og duha ka pakete sa gituohang shabu nga may gibug-aton nga 11 gramos ug gibanabanang kantidad sa merkado nga P62,360, ingon man ang buy-bust money ug uban pang mga ebidensya.
Samtang, laing buy-bust operation ang gipahigayon sa Purok 4, Barangay Nangka, Consolacion, nga miresulta sa pagkasikop sa duha ka lalaki.
Gikanayon ni PDEA-7 Information Officer Leia Alcantara, nagpahigayon ang ahensya og duha ka semana nga pagtigom og ebidensya batok sa duha ka giingong nalambigit sa ilegal nga droga sa Consolacion ug sa gidudahang drug den sa Talisay human nakadawat og impormasyon gikan sa kasaligang tinubdan.
Dugang ni Alcantara nga basi sa impormasyon sa PDEA, ang duha ka indibidwal giingong makahimo sa pagbaligya og hangtod sa usa ka kilo nga shabu matag semana, samtang ang gidudahang drug den sa Talisay giingong namaligya og anaa sa 50 gramos matag semana.
Giandam na sa PDEA-7 ang mga kaso batok sa mga suspek kalabot sa giingong paglapas sa Republic Act 9165, o ang Comprehensive Dangerous Drugs Act of 2002.
